歐霸盃：維拉半細唔使同里急_東方日報

揸住1球專注防守
歐霸盃16強次回合，近況極差嘅阿士東維拉主場迎戰里爾，以佢哋近期頹勢，想贏波並冇把握，不過維拉首回合有1比0領先優勢，今場肯定堅守城池，但求唔輸波就可以出線。里爾本身鋒力亦好疲弱，作客唔會輕率搶攻，博1.5球半場細好路。

（Now 643周五凌晨4時直播）文:工廠仔

阿士東維拉喺英超3連敗，前4位置岌岌可危，如果想下季有得踢歐聯，搶歐霸盃冠軍亦係可行出路，尤其佢哋有「歐霸之鬼」艾美利領軍，呢位曾經4奪歐霸盃冠軍嘅西班牙教頭，深明歐洲賽玩法，首回合喺球隊頹勢中都作客贏到里爾，今場有力守住領先優勢。

維拉今季多線作戰，球員踢到季尾已疲態畢露，最擅長嘅逼搶踢法，往往只係頂得到半場，去到下半場就跌晒Watt，近4場比賽有3場半場0比0，但去到下半場就冧檔，近9個失球有7球係喺下半場出現。最重要係，維拉今場有1球優勢可以守，唔需要花太多力氣諗進攻，防守可望更加穩定。

里爾作客留前鬥後
里爾雖然非勝不可，不過落後1球形勢唔算太惡劣，作客情況肯定貫徹穩守風格，等下半場再伺機進攻。里爾已經連續6場半場0失球，近11場比賽半場全開1球或以下，當中有6場開0比0。既然兩隊都唔敢貿然出擊，上半場拉鋸機會極大，一於追半場細。